隴式伯公

【文、圖∕徐貴榮∕國立中央大學客家語文暨社會科學學系兼任助理教授】

 

　　天、地、水係關係人間生活盡重要个三樣，故所人信天神、地神、水神，祭拜佢兜，希望佢兜保佑。其中地神係亻恩兜漢人盡普遍个信仰，名仔各有不同，學老人安到「土地公」，客家人同佢人格化，像亻恩當親个人，喊佢「伯公」。

　　土地神个神格雖然異細，毋過當像人个事務總管樣仔。民間除忒去求屋下平安以外，還愛求五穀豐登、財源廣進、遠行平安、降子順利、事業順序。故所，耕田人割禾愛拜伯公，生理人賺錢「做牙」拜伯公，一般人降子降女煮好雞酒敬伯公，愛去遠位求伯公保佑。逐年伯公生食「伯公福」，求一庄个平安、風調雨順，還做得聯絡庄民情感，可見伯公受着人个敬重。

　　伯公在各位所化身保護陰陽兩界。除忒莊頭莊尾、水頭水尾个伯公以外，在風水脣項个安到「后土」，一般講「伯公仔」，保護等俚个祖公。客家人甚至在廳下對中，祖先神桌下安龍神，安到「土地龍神」抑係「龍神伯公」，來鎮屋，也就係講保護等一家屋人。

　　土地神正式个名仔安到「福德正神」，廟名大部分寫「福德祠」，毋過客家人慣勢講「○○伯公」。胚想盡早个伯公，可能係三粒石頭開始，無祠名，大家會講「伯公下」，愛去伯公下敬伯公。（圖1、2）後來慢慢仔起祠、起廟，正有這下个「福德祠」名。



　　講着伯公祠个建築形式，台灣北部當像大部分係從三粒石來个，毋過南部就毋係恁樣！當像「風水」樣仔，故所就有學者抑係學術單位講佢安到「墓式伯公」。𠊎試着恁樣講無麼个著，佢毋係風水呀！雖然當像，毋過乜做毋得講佢係墓式啊！因為一般客家建築後背拱起來个地方，「人屋」安到「化胎」，「風水」安到「墓龜仔」，「伯公下」安到「伯公隴」，後背還會種一頭伯公樹。（圖3、4）佢有名好喊个，可惜有人毋知深層个客家文化，「看着一隻影，就生一隻頸」。



　　為着愛正名起見，希望客家學者愛企起來講，發表論文，明明就毋係風水，仰做得講佢係「墓式」个呢？有伯公隴好喊，俚就愛同佢正名到「隴式伯公」。

　　（隴，音四縣、大埔liungˇ，海陸、新竹饒平liung，詔安、卓蘭饒平liungˋ）
　　
徐貴榮教授 聲檔 —隴式伯公（四縣腔）





　

▲BACK